ՄՈւՇ ԵՎ ՍԱՍՈՒՆ․ ԹԵՄԱՏԻԿ 5 ՕՐ

ԲՈւՆ ՍԱՍՈՒՆ, ԽՈւԼՓ, ԳԵԼԻԵԳՈւԶԱՆ, ՄՇՈ ԱՌԱՔԵԼՈՑ ԵՎ ՍԲ ԿԱՐԱՊԵՏ ՎԱՆՔԵՐ + ՎԱՆ, ԲԻԹԼԻՍ, ԿԱՐՍ, ԲԵՐԿՐԻ

Իրապես բացառիկ այս ուղևորության ընթացքում մեզ են սպասում մեր Հայրենիքի ամենանշանակալի անկյուններից Սասունի ու Մուշի անհաշվելի գանձերից շատերը։ Սասունցի Դավթի հետքերով, ֆիդայիների հերոսական ուղիներով, գեղեցկագույն տեսարաններով, պատմական մեծարժեք կոթողներին ծանոթանալով՝ մենք կանցկացնենք մեր անկրկնելի հինգ օրը։ Ձեզ ուղեկցելու են Սասունի և Մուշի ուղղությամբ հատուկ մասնագիտացած մեր պրոֆեսիոնալ գիդերը, որոնք այս ուղղության համար միակ խորացված ուղեկցորդներն են Հայաստանում: Այս հագեցած ու տպավորիչ ծրագրով ոչ միայն այցելելու ենք Մշո Սուրբ Առաքելոց, Սուրբ Կարապետ, Գոմոց վանքերը, այլ նաև լինելու ենք Սասունում՝ տեսնելով Մարաթուկ, Սիմ, Անդոկ, Ծովասար լեռները, Դավթի բերդը, շրջելու ենք մի շարք լեգենդար հայկական գյուղերով: Բացի այդ, կլինենք նաև Կարսում, Սարիղամիշում, Վանա լճի ափին, Բերկրիում, Բիթլիսում, ինչը մեր ուղևորությունն էլ ավելի հարուստ կդարձնի: Միևնույն ժամանակ, այս ուղևորության ընթացքում հնարավոր են խմբի անդամների՝ Սասունում և Մուշում իրենց նախնիների բնակավայրեր այցելություն, ինչը պետք է նախօրոք համաձայնեցնել մեր գրասենյակում:

Մեկնումը՝ 

5։00, վերադարձը՝ մոտ 23։00, հասցե՝ Թումանյան 8

Գինը՝
155000 դրամ
Ներառում է՝

3+ և 4 աստղանի բարձրակարգ հյուրանոցներ

բարձրակարգ տրանսպորտը (Mercedes Sprinter/ Volkswagen Crafter միկրոավտոբուս, մինչև 18 տեղ)

2 անգամյա որակյալ սնունդ բոլոր օրերին (ընտրովի ճաշացանկ)

պրոֆեսիոնալ գիդի ծառայությունը (հայտնի հայ թուրքագետներ, ամեն խումբը՝ իր առանձին գիդով)

Չի ներառում՝

ՀՀ քաղաքացիների համար Թուրքիայի մուտքի վիզան 15.000 դրամ է, այն պատրաստում է մեր ընկերությունը: Վիզան տոմսի գնի մեջ ներառված չէ։

Մանրամասն Ծրագիր

ՕՐ 1 | ԲԱՍԵՆՆ Ու ՄՈւՇԸ

Ճանապարհ ընկնելով Երևանից և անցնելով Բավրայի անցակետով՝ մուտք ենք գործում Ջավախք աշխարհ, որտեղից էլ, հատելով թուրք-վրացական սահմանը, անցնում ենք չնաշխարհիկ Ծովակն լճի ափերով՝ ուղի բռնելով դեպի հայոց թագավորների բերդաքաղաք Կարս: Շուտով կանցնենք Սարիղամիշի մշտադալար անտառներով, ապա կտեսնենք Մայր Արաքսն ու հրաշագեղ Հովվի կամուրջը, որից հետո մեր ճամփան գնում է դեպի քաղցր Մուշ.․. Մշո սուլթան Սուրբ Կարապետ, անուն, որը բարդ է գրել ու անգամ պատկերացնել Տարոն աշխարհից զատ, վայր, ուր երազել են ուխտ կատարել հազարավոր հայեր: Իսկ մեր աշխատանքը նման երազանքների իրականացումն է:  Սակայն այսքանով էլ մեր ճամփորդության առաջին ու հագեցած այս օրը չի սպառել անակնկալների իր չափաբաժինը․ հասնելով Մուշ քաղաք՝ կտեսնենք նաև  լեգենդար Սուլուխի կամուրջը, որը Մշո դաշտը կապել է Արածանի գետի վրայով, և որտեղ իր վերջին կռիվն է տվել ֆիդայապետ Գևորգ Չավուշը:

Երևան-Գյումրի-Ախալքալաք-Կարծախ [Վրաստան]

Ծովակն Հյուսիսոյ (Չըլդըր) լիճ

ճաշ Կարսում

Բասեն. Հովվի կամուրջ և Արաքս գետ

Խնուսով և Վարդոյով անցում

Մշո Սուրբ Կարապետ վանք

Մշո դաշտ, Արածանի գետ, Սուլուխի կամուրջ

ընթրիք Մուշում գիշերակաց՝ Մուշ:

ՕՐ 2 | ՄՈւՇԻՑ ԴԵՊԻ ՍԱՍՈւՆ

Մեր ճամփորդության երկրորդ օրվա առավոտը հենց սկզբից լի է զգացական պահերով ու մեծ էներգիայով: Սուրբ Մարինե և Մարինեի թաղ․․․Մուշի հին հայկական թաղամասում չնայած ժամանակի ուժին և եղած ավերածություններին՝ չենք կարող կրկին չզգալ հին Մուշի շունչը։ Սակայն այսօր ամենը դեռ առջևում է․ Առաքելոց վանքի բարձունք: Վայր, ուր դիմադրել են Անդրանիկն ու բազմաթիվ այլ հերոսներ, և վայր, ուր այցելությունն առանձնահատուկ խորհուրդ ունի։ Ծվատված, հզոր ու ազդեցիկ․ Առաքելոց վանքն անջնջելի տպավորություն է յուրաքանչյուր ուխտավորի ամբողջ կյանքի համար։ Եվ ահա վերջապես մեր առաջ իր դռներն է բացում Սասնո լեռնաշխարհը․ անցնելով Սիմ լեռան լանջերով՝ մուտք կգործենք Սասունի ազատագրական շարժման օջախներ Շենիկ, Սեմալ ու Գելիեգուզան։ Սասնո խրոխտ լեռները, խորը ձորերն ու կիրճերը, որոնք դժոխքի միջով անցնելուց հետո շարունակում են ամեն անգամ վերածնվել ու դրախտ մնալ, անջնջելի հետք են թողնում յուրաքանչյուր հայի հոգում, որին բախտ է վիճակվել անցնել ֆիդայիներ Ըսրոյի, Աղջեի, Աղբյուր Սերոբի և Արաբոյի անցած այս ճանապարհներով։ Այս օրվա մեր ամենակարևոր կանգառներից է Գելիեգուզանում գտնվող Թուխմանուկ վանքն ու դրա բակում ֆիդայապետեր Աղբյուր Սերոբի և Հրայր Դժոխքի գերեզմանները, ինչից հետո մեզ է սպասում ալեհեր Անդոկը և դրա արևմտյան ափին փռված պատմական Խուլփ շրջանը։ Հետևելով Խուլփի ջուր գետի հոսանքին՝ հասնում ենք Սասուն աշխարհի հարավ՝ թակելով Սասնո լեռնաշխարհի հարավային դարպասը։

նախաճաշ հյուրանոցում

Մուշի հայկական թաղամաս, Սուրբ Մարինե եկեղեցի և հայկական տներ

Մշո Առաքելոց վանք (քայլարշավ)

Անցում Սիմ (Կուրտիկ) լեռան լանջերով

Բուն Սասուն և Սասնո Շատախ. Սեմալ և Շենիկ գյուղեր

Գելիեգուզան. Թուխմանուկի վանք, Աղբյուր Սերոբի և Հրայր Դժոխքի գերեզմաններ

ճաշ Մուշում

Խուլփ-Խիյանք

Անդոկ լեռան համայնապատկեր

Խուլփի ջուր գետ

գիշերակաց՝ Բաթման:

ՕՐ 3 | ՇԱՐՈւՆԱԿԵԼՈՎ ԲԱՑԱՀԱՅՏԵԼ ՀԱՅՐԵՆԻՔԸ

Այսօր էլ մեզ է սպասում մեր ուղևորության կարևորագույն ևս մեկ կանգառ՝ գյուղ Մկթենք․ այո, ճիշտ հասկացաք, Գևորգ Չաուշի ծննդավայր Մկթենքը, Սասնո Բսանաց գավառի ամենագեղատեսիլ գյուղերից մեկը։ Ավելին, մեզ բախտ կվիճակվի նաև տեսնել նշանավոր հայդուկի հայրական տունը։ Իսկ ավելի ուշ մեզ է սպասում խրոխտ Սասնա բերդը։ Նույն ինքը՝ հայոց էպոսից մեզ հայտնի Սանասար և Բաղդասար եղբայրների կառուցած Սյան Սյունը։ Սակայն այստեղ էլ հույզերի ու անմոռանալի տպավորությունների տարափը չի ավարտվում․ առջևում է Սասունի բարձր լեռներում ծվարած Սուրբ Պետրոս առաքյալի վանքը՝ Սասուն աշխարհի զարդ Գոմոց վանքը։ Եվ ահա Մարաթուկի փեշերին փռված պատմական Խաբլջոզն է, որտեղ մեզ է սպասվում Սասնա ջրի հայտնի կարմրախայտ ձկան հյուրասիրությունը:

նախաճաշ հյուրանոցում

Բսանաց գավառ. Մկթենք. Գևորգ Չավուշի տուն

Սասնա բերդ (Սանասուն, Դավթի բերդ) և գյուղ Քաղկիկ

Ծովասար և Մարաթուկ լեռների համայնապատկերներ

Սուրբ Պետրոս Առաքյալի (Գոմոց) վանք (քայլարշավ)

ճաշ կամ ընթրիք Սասունում

Խաբլջոզ, Սասնաջուր գետ

գիշերակաց՝ Բաթման:

ՕՐ 4 | ԴԵՊԻ ԲԻԹԼԻՍ ԵՎ ՎԱՆ

Ահա և նա՝ Բաթմանա հազարամյա կամուրջը, որը, չենթարկվելով ժամանակի օրենքներին, նույն վեհությամբ ու գեղեցկությամբ շարունակում է զարմացնել ամեն անցորդի։ Անչափ տպավորիչ այս կամրջի մասին հիշատակություն կա նաև Սասնա ծռեր էպոսում։ Մեզ է սպասում նաև Հազզոյի գավառակն ու Հազզոյի բերդը, որոնք տեսնելուց հետո մեր ճանապարհը կշարունակենք չնաշխարհիկ Վանա լճի արևմտյան ու հյուսիսային ափերով։ Վանա լճի ափին էլ նախատեսված է հաճելի ու գեղեցիկ դադար։

նախաճաշ հյուրանոցում

Սասնո հարավային դարպասներ՝ Բաթմանա կամուրջ և Բաթման/Քաղիրթ գետ

Հազզոյի գավառակ և Հազզոյի բերդ

Բիթլիս (Բաղեշ)

ճաշ Դատվանում

Ազատ ժամանակ Վանա լճի ափին

Վանա լճի հյուսիսային ափով անցում՝ Արծկե, Խլաթ, Արճեշ

գիշերակաց՝ Բերկրի:

ՕՐ 5 | ԴԵՊԻ ԿԱՐՍ

Մեր ճամփորդության վերջին օրվա առաջին կանգառը Բերկրիի ջրվեժն է՝ տարբերվող և գերող իր տեսարանով: Բնության այս հրաշալիքը շարունակ ձգում է ու զարմացնում, իսկ Բերկրի գետի արագահոս ջրերը մի քանի կիլոմետրից միախառնվելու են Վանա լճին: Եվ ահա Թոնդրակն ու իր լավայի դաշտերն անցնելուց հետո վերջապես մեր առջև նա է՝ Մասիսը «մյուս» կողմից..․ Փշաքաղեցնող տեսարան: Եվ ահա գալիս է ամեն հայի երազած պահերից մեկը՝ անցումը Մասիսի լանջերով: Շուտով մեր ճանապարհն անցնելու է Իգդիրով, իսկ քիչ անց տեսնելու ենք Հայաստանի Հանրապետությունը մյուս կողմից՝ ձեռքի ափի հեռավորության վրա: Կանգառ Մայր Արաքսի ափին, որը շուտով միախառնվելու է Ախուրյանին: Առանձնահատուկ է ուղևորությունը դեպի Կարս, որտեղ մեզ հայկական պատմության և՛ փառավոր, և՛ տխուր էջերն են սպասում:  Կարուց բերդն իշխում է ոչ միայն քաղաքի վրա, այլ նաև շրջակայքի: Դարերի ընթացքում կարևոր դեր ունեցած այս բերդը վսեմաշուք է նաև մեր օրերում: Պատրա՞ստ եք գրոհի: Ուրեմն՝ առա՜ջ: Կարուց բերդը հաղթահարելուց հետո ձեր առջև բացվում է երբեմնի հայկական հրաշք քաղաքի համայնապատկերը, որտեղ իր ուրույն տեղն ունի տառապյալ, բայց հզոր Սուրբ Առաքելոց եկեղեցին՝ փառահեղ, ազդու կոթող՝ իր յուրահատուկ ճակատագրով և բազում-բազում պատմություններով: Իսկ Կարսում ինչպե՞ս կարելի է չանցնել Վարդանի կամրջով, ինչպե՞ս չգնալ այն տան վայրը, ուր ապրել է մեծանուն գրող Եղիշե Չարենցը: Տեղն է վերհիշել «Երկիր Նաիրին» և զգալ նրա ամեն տողը հայկական պատմական հետքը չկորցրած այս քաղաքում, որտեղ հինավուրց շենքերի ճակատներից դեռ չեն հասցրել ջնջել հայերեն տառերը։

նախաճաշ հյուրանոցում

Բերկրիի ջրվեժ

Թոնդրակ լեռ և Լավայի դաշտեր

Մասիսի լանջերով անցում

Իգդիր քաղաք, Արաքս գետ, հայ-թուրքական սահման

ճաշ Կարսում

Կարս. Կարուց բերդ, Վարդանի կամուրջ, Սբ. Առաքելոց եկեղեցի, Չարենցի տուն

Վերադարձ՝ Կարս-Ախալքալաք-Երևան:
Գինը` 155000 դրամ
Դուք դեռ տուր չեք ընտրել