ՊՈԼԻՍ - ՍՏԱՄԲՈՒԼ 5 ՕՐ

Երևանից թռիչքից հետո վայրէջք կկատարենք Ստամբուլի օդանավակայանում, որտեղից կմեկնենք հյուրանոց, կտեղավորվենք, ապա կճաշենք տեղի համեղ սննդով ռեստորաններից մեկում: Այսօր մենք բացահայտելու ենք Ստամբուլի համեմատաբար նոր կենտրոնը և քայլելու ենք քաղաքի հին ու գեղեցիկ փողոցներով: Կլինենք Թաքսիմ հրապարակում, որի հարևանությամբ ժամանակին եղել է հայկական եկեղեցի և գերեզմանատուն, ապա կքայլենք պատմական կոթողներով հարուստ Իսթիքլալ հետիոտնային պողոտայով, իսկ հարևանությամբ հայ առաքելական Սբ Երրորդություն եկեղեցին է: Ստամբուլն Արա Գյուլերի աչքերով են շատերը տեսել, իսկ մենք կայցելենք նաև մեծանուն լուսանկարչի հայտնի սրճարանը, որտեղ կվայելենք թեյ։ Ապա կքայլենք Գալաթայի աշտարակն ու Ոսկե եղջյուրի ծովածոցը վայեյելու։

Մեր հրաշալի ուղևորության երկրորդ օրը կայցելենք Ստամբուլի գլխավոր խորհրդանիշն ու այցեքարտը համարվող Սուրբ Սոֆիայի հրաշագեղ տաճար, որը ոչ միայն համաշխարհային ճարտարապետության գլուխգործոց է, այլ նաև այս տաճարի գմբեթը վերականգնել է Անիի աշխարհահռչակ ճարտարապետ Տրդատը: Սուրբ Սոֆիայի տաճարը բացահայտելուց հետո մենք կայցելենք հարևանությամբ կառուցված ևս մեկ հետաքրքիր կառույց՝ Կապույտ մզկիթ: Ճաշելուց հետո մեզ սպասվում է զբոսանք Ստամբուլի պատմական կենտրոնում, այդ թվում՝ Սուլթանահմեթ հրապարակում, որտեղ տարբեր պատմական շերտերի կոթողներ կտեսնենք: Այսօր մեզ է սպասվում նաև այցելություն Պոլսո հայոց պատրիարքարանին կից հայկական Սբ Աստվածածին եկեղեցին։ Գեղեցիկ այս օրվա երեկոն ևս Ձեր տրամադրության տակ է:

Երրորդ օրը կտեսնենք Ստամբուլի կարևոր հայկական կրթօջախներից Կեդրոնական վարժարանը, որի անմիջական հարևանությամբ է Սբ Գրիգոր Լուսավորիչ եկեղեցին, որն անչափ տպավորիչ կառույց է: Այնուհետև, մեզ է սպասվում Դոլմաբահչե սուլթանական պալատը, որը կառուցել են հայ ճարտարապետներ Պալյանները: Պալյանները ոչ միայն Դոլմաբահչեի, այլև Ստամբուլի մի շարք պատմական շինությունների, այդ թվում և մզկիթների հեղինակ են ու վայելում էին մեծ հռչակ: Հայ ճարտարապետների հանճարի արտացոլումն էլ Դոլմաբահչեն է, որը մանրամասն բացահայտվելու համար էլ կլինենք այնտեղ: Օրվա մնացած հատվածը կանցկացնենք Բոսֆորով նավարկելու և Քընալըադա կղզի գնալու համար, որտեղ նաև հայկական եկեղեցին կտեսնենք ու կվայելենք մեր ազատ ժամանակը կղզու լողափերում։

Մեր այս հրաշալի օրվա առաջին կանգառը Թոփքափը սուլթանական պալատն է, որտեղ կբացահայտեք, թե ինչպես են ապրել սուլթանները: Հսկա այս պալատը ոչ միայն հետաքրքիր է պատմություններով ու հետաքրքիր կառույցներով, այլ նաև այստեղից հրաշալի տեսարան է բացվում դեպի Բոսֆորի նեղուցն ու քաղաքը: Արևելքով ներծծված այս կառույցից հետո մենք կայցելենք Բազիլիկա ցիստեռն, որը դեռևս հռոմեական ժամանակներում կառուցված գետնափոր ջրի ամբար է, ուր պահպանվել է Գորգոն Մեդուզայի գլխի գեղեցիկ քանդակը: Այս խորհրդավոր ու տպավորիչ վայրից հետո մեզ է սպասում Ստամբուլի լեգենդար վայրերից Փակ շուկան, որտեղ իրենց աշխատանքներն են ներկայացնում նաև հայ ոսկերիչներն ու վարպետները։

Ազատ օրը կարող եք օգտագործել Ձեր ցանկությամբ ու նախապատվությամբ թանգարանների, գնումների, հետաքրքիր վայրերի այցելության կամ այլ զբաղմունքի համար: Բոլոր այս հարցերով մեր ուղեկցորդը Ձեզ կտրամադրի մանրամասն տեղեկություն: Հնարավոր են նաև խմբի ցանկության դեպքում հավելյալ տուրերի կազմակերպում: Երեկոյան կմեկնենք օդանավակայան և կվերադառնանք Երևան։