Համշեն տուր

Մեր ուղևորության առաջին, անակնկալներով լի օրը սկսում ենք Լոռիի ամենանշանավոր գյուղերից մեկից՝ Կուրթանից, որտեղ բացի տեղի պատմամշակութային կոթողներից, մեզ է սպասում նաև Կուրթանի տպավորիչ ձորը, տեղացիների ջերմ հյուրընկալությունն ու իսկական Լոռվա կոլորիտը։ Ճանապարհը շարունակվում է դեպի Հնեվանք՝ Հայաստանի ամենայուրահատուկ վանքերից մեկը, որը անջնջելի տպավորություն է թողնում յուրաքանչյուրի մոտ։ Ապա թեթև քայլարշավով կհասնենք Արևածագի ձոր, որտեղ կվայելենք մեր հանգիստը։ Առջևում է Ամրակիցի յուրօրինակ մի կառույցը․ ռուսական Սուրբ Նիկողայոս հրաշագործ եկեղեցին, որն առաջին հայացքից կարծես հեքիաթի էջերից իջած լինի։ Օրվա վերջում դեռ պիտի քայլենք Լոռի բերդի խորհրդավոր արահետներով՝ վայելելով պատմական շունչն ու Ձորագետի կիրճի հրաշալի տեսարանը։ Երկրորդ օրվա առաջին կանգառը Վերին Հոռամայրի հուշարձանախմբի մոտ է՝ դեպի Ներքին Հոռոմայր և Դեբետի կիրճ բացվող խենթացնող տեսարանով, որից հետո կայցելենք Օձունի հոյակերտ տաճար․ վայր, առանց որի բարդ է պատկերացնել Լոռիի ուղևորությունները։ Ապա կհասնենք վեհաշուք Սանահին․ խորհրդավոր և միշտ ձգող վանական համալիրը՝ դարերի խորքից եկող իր հզոր էներգիայով։ Սանահինի քարաշեն կամուրջն էլ գալիս է ապացուցելու, որ Հայաստանը ոչ միայն վանքերի, այլև յուրահատուկ ու ամուր կամուրջների երկիր է։ Հերթն է Հաղպատի վանական համալիրի՝ Լոռվա մեկ այլ հրաշքի, որից հետո միայն կվերադառնանք Երևան։