Համշեն տուր

Անցնելով Բավրայի անցակետով և Ջավախքով՝ մուտք կգործենք լեռնային Արդահան: Մեր առաջին կանգառը կանաչի աշխարհ Շավշատի սրտում է՝ աննման Սև լճի ափին, որը պատրաստ է խենթացնելու իր այցելուներին։ Կայցելենք նաև Բագրատունիների կառուցած վեհաշուք տաճարներից Տբետը, որն անչափ տպավորելու է բոլորին։ Գեղատեսիլ Շավշատում կտեսնենք նաև տեղի հայտնի բերդը՝ կառուցված Բագրատունիների կողմից, ինչպես և բերդի ամենաբարձր կետից կկարողանանք վայելել շրջակայքի հրաշագեղ բնությունը: Մեզ է սպասում նաև այդքան սիրված Ճոխ Ճորոխ դիտակետը, որտեղից կտեսնենք Հայոց լեռնաշխարհի չորս կարևորագույն գետերից Ճորոխի շունչ կտրող տեսարանն ու բարձրադիր Արդվին քաղաքը, ապա Բորչկա գավառակով կհասնենք Սև ծովի ափ, որտեղ էլ համշենյան Խոփա / Հոպա քաղաքում մեր գիշերակացն է։

Առավոտյան Սև ծովի համայնապատկերով նախաճաշից հետո կուղևորվենք՝ բացահայտելու Համշեն աշխարհի հրաշալիքները, տեսնելու Քաջքարի հպարտ լեռները: Նախ, կայցելենք Զույգ կամուրջներ, որոնք վայելելուց հետո սաղարթախիտ անտառներում թաքնված Մանջունայի հզոր ջրվեժ կքայլենք: Այնուհետև, մուտք կգործենք Ֆուրթունա գետի կիրճ, որը տպավորությունների նոր չափաբաժին կապահովի: Կտեսնենք համշենյան հրաշալի կամուրջները, կբարձրանանք թավ անտառներում, ժայռերի վրա վեր խոյացող ամրակուռ Զիլ ամրոցը, որը աշխարհի ամենատպավորիչ բերդերից է: Քիչ հեռվում Բալահովտի շառաչուն ջրվեժն է, որն առանձնանում է իր հզորությամբ, ջրի շիթերն անգամ տասնյակ մետրներ այն կողմ են հասնում, իսկ ջրվեժի ձայնը լսելի է լինում բավական հեռվից: Բալահովտի ջրվեժից հետո կայցելենք Այդերի հայտնի յայլան (բնակատեղին), որը զբոսաշրջային կենտրոն է՝ իր գեղատեսիլ անտառներով, գահավիժող ջրվեժներով, յուրահատուկ ճարտարապետությամբ, համշենյան տարազներով, տեղանքին բնորոշ հետաքրքիր երաժշտությամբ: Այստեղ մենք կհամտեսենք համշենյան կերակրատեսակներ, ինչպես և կվայելենք համշենյան լեգենդար թեյը:

Երրորդ օրն ամբողջությամբ նվիրված է Տրապիզոնին, հույներով ու հայերով բնակեցված երբեմնի ծաղկուն ու հարուստ պատմությամբ գեղեցիկ այս քաղաքին ու շրջակայքին: Այսօր էլ դեռ կարելի է գտնել հայկական ու հունական հարուստ հետքերը Տրապիզոնում և նրա շրջակայքում: Տրապիզոնում է նաև աշխարհահռչակ Սումելա վանքը՝ կառուցված ժայռերի վրա՝ շունչ կտրող տեսարաններով: Տրապիզոնում կտեսնենք հայկական Սուրբ Ամենափրկիչ եկեղեցին, որտեղ պահպանվել են տպավորիչ և գեղեցկագույն որմնանկարներ, որոնցով կարելի է ժամեր շարունակ հիանալ: Կտեսնենք նաև Սուրբ Սոֆիայի տաճարը՝ հունական հնամենի եկեղեցին Տրապիզոնի սրտում: Պատմությամբ ներծծված օրվանից հետո կվերադառնանք Հոպա, որտեղի լողափում էլ կունենանք ազատ ժամանակ․ ցանկացողները կարող են լողալ կամ հիանալ գեղեցիկ տեսարաններով ու գեղեցիկ մայրամուտով։

Վերադարձի օրն անգամ հարուստ է և գեղեցիկ։ Մեզ է սպասում Դոլիսխանայի եկեղեցին, որի տեղադրությունն ու հետաքրքիր ճարտարապետությունը հրաշալի է։ Այնուհետև, թեթև ու գեղեցիկ քայլարշավ կունենանք Դժոխքի ձորում, որը միանշանակ կտպավորի մեզ։ Նախատեսված է նաև դադար Արդահանի հզոր բերդն ու Քուր գետը տեսնելու համար, որոնք մեր այցն էլ ավելի հագեցած ու հետաքրքիր կդարձնեն։ Եվ միայն այս ամենը տեսնելուց հետո կարող ենք մտածել վերադարձի մասին։