ԱՄԱՆՈՐԸ ՎԱՆՈւՄ + ՁՄԵՌԱՅԻՆ ԱՆԻ, ԿԱՐՍ, ԲԵՐԿՐԻ

Հեքիաթային ու խորհրդանշանական Ամանորի մեր ուղևորությանը սկզբից կտեսնենք Ծովակն Հյուսիսո լիճը, որը ձմռանը սառցակալում է՝ դառնալով զբոսաշրջային խոշոր կենտրոն, ուր անգամ հնարավոր է ձիասայլ քշել: Կարսն առանձնակի տպավորիչ է ձմռանը, ինչն էլ միասին կբացահայտենք․ կտեսնենք Կարսի բերդը, Առաքելոց եկեղեցին, Վարդանի կամուրջն ու Չարենցի տունը։ Առաջին օրը մեզ սպասվում է նաև անչափ տպավորիչ անցումը Մասիս լեռան լանջերով։

Վանում նախատոնական օրվա առաջին կեսին կունենանք հետաքրքիր այցեր, իսկ օրվա երկրորդ կեսին կտրվի հանգիստ, որ պատրաստվեք Ամանորյա հրաշալի ծրագրին։ Օրը կսկսենք Ագռավաքարից, որտեղ էլ լեգենդար Մհերի դուռն է։ Ապա այցի կգնանք Վանա կատուներին, որից հետո էլ մեզ կդիմավորի Վանի հզոր բերդը։ Հիանալի այս այցերից հետո Ձեզ կտրվի ազատ ժամանակ, իսկ արդեն ուշ երեկոյան կնախապատրաստվենք Ամանորի տոնակատարությանը: Ամանորին նախատեսված է հետաքրքրագույն ծրագիր, որն ամբողջովին հայկական է՝ հայկական երաժշտություն, ազգային երգ ու պար, համեղ ուտեստներ, տոնական շամպայն և ավելին:

Մեր ուղևորության այս օրը խիստ խորհրդանշանական է, քանի որ Նոր տարվա առաջին իսկ օրը կլինենք Հայոց ձորի Հայկաբերդում, որտեղ էլ, ըստ մեր ավանդազրույցների, իր կռիվն է տվել Հայկ Նահապետը, ասել է, թե տարվա սկիզբը կսկսենք հայոց սկզբից։ Ամենալավ Ամանորը չի կարող շրջանցել տիեզերական Աղթամար կղզին Սուրբ Խաչ եկեղեցով․ կնավարկենք Աղթամար կղզի, կվայելենք կղզին և եկեղեցին, ինչպես նաև Վանա լճի հեքիաթային տեսարանները։ Մեր այս օրը յուրահատուկ է նաև այցով Վասպուրականի հոգևոր կենտրոն Վարագավանք, որտեղից կբացվի ձմեռային հրաշալի տեսարանը դեպի Վանա լիճն ու Վան քաղաքը։

Վերադարձն անգամ հագեցած է գեղեցիկ այցերով։ Առաջին կանգառը ձմռանն անչափ տպավորիչ Բերկրիի ջրվեժում է, որից հետո կհասնենք Մայր Արաքսի ափերին։ Իսկ օրվա վերջին այցն անկրկնելի Անիում է, որը ձմռանն ուղղակի ֆանտաստիկ է դառնում և տպավորելու է ամբողջ կյանքի համար։ Կշրջենք չքնաղագույն Անիի փողոցներով՝ տեսնելու գլուխգործոց կոթողներն ու հրաշալի տեսարանները։ Ամանոր, որն իր բովանդակությամբ և խորհրդանշականությամբ, կդառնա իրապես բացառիկ ու հիշարժան։